اندھیرے میں نماز پڑھنا کیسا ہے ؟

سوال

السلام علیکم و رحمۃ اللّٰہ وبرکاتہ

 بعد سلام عرض یہ ہے کہ اندھیرے میں نماز ادا کرنا کیسا ہے 

رہنمائی فرما دیں بہت نوازش ہوگی 

سائل ۔محمد ساحل رضا قادری  

وعليكم السلام ورحمۃ اللہ و برکاتہ 

 اندھیرے میں نماز ادا کرنا بلا کراہت جائز و درست ہے جبکہ قبلہ کا رخ یقینی طور پر معلوم ہو،
اور اندھیرے میں نماز ادا کرنا رسول اللہ صلی اللہ علیہ وسلم سے ثابت ہے 

 امام بخاری نے اپنی صحیح بخاری میں اس حدیث کو نقل فرمایا ہے

 عن عائشة زوج النبی صلی الله علیہ وسلم إنها قالت کنت أنام بین یدي رسول الله صلی الله علیه وسلم ورجلاي في قبلته فإذا سجد غمزنی فقبضت رجلي فإذا قام بسطتھما قالت والبیوت یومئذ ليس فیھا مصابيح

 ترجمہ، حضرت عائشہ رضی اللہ عنہا سے روایت ہے کہتی ہیں کہ میں رسول کونین صلی اللہ علیہ وسلم کے سامنے لیٹی ہوئی تھی اور میرے دونوں پیر نبی کریم صلی اللہ علیہ وسلم کے قبلہ کی جانب میں تھے جب آپ سجدہ کرتے تو آپ اشارہ کرتے تو میں اپنے دونوں پیروں کو سمیٹ لیتی جب آپ قیام میں جاتے تو میں پیروں کو پھیلا لیتی پھر حضرت عائشہ رضی اللہ عنہا کہتی ہیں کہ اس وقت گھروں میں چراغ نہیں ہوتے تھے

 اس حدیث کے آخری ٹکڑے سے معلوم ہوا کہ جب چراغ نہیں تھا تو آپ صلی اللہ علیہ وسلم نے اندھیرے میں نماز ادا کی

لہذا اندھیرے میں نماز ادا کرنا بلا کراہت جائز و درست ہے

  واللہ ورسولہ اعلم بالصواب