اذان ہونے کے بعد مسجد سے نکلنا کیسا ہے؟

سوال

السلام علیکم ورحمۃ اللہ وبرکاتہ

 کیا فرماتے ہیں علمائے کرام و مفتیان عظام اس مسئلہ کے بارے میں کہ اذان ہونے کے بعد مسجد سے نکلنا جائز ہے یا نہیں زید کا قول ہے کہ مسجد سے نکلنا جائز ہے تو کیا زید کا قول درست ہے

 مدلل و مفصل قرآن وحدیث کی روشنی میں جواب عنایت فرمائیں

 سائل محمد انور خان رضوی علیمی پتہ شراوستی یوپی

 
جواب

 اذان کے بعد مسجد سے نکلنے کی تفصیل میں اصل یہ ہیکہ اگر وقت نماز ہوگیا اور ابھی نماز ادا نہیں کی اور بے سبب و بے ضرورت مسجد سے چلا گیا اور نماز و جماعت میں واپس آنے کا بھی ارادہ نہیں رکھتا تو ایسا جانا مکروہ تحریمی و گناہ کبیرہ اور منافق کی علامت ہے، اور ضرورتاً مثلاً دوسری مسجد میں اذان یا نماز کی ذمہ داری ہے یا اور کسی حاجت شدیدہ کے سبب جانا ہو تو چلا جائے اسمیں حرج نہیں، مگر ہر گز نماز ترک نہ کرے کہ یہ سخت ترین کبیرہ گناہ ہے

حدیث پاک میں ہے 

امیر المومنین حضرت عثمان رضی اللہ تعالیٰ عنہ سے روایت کیا ہے کہ رسول اللہ صلی اللہ تعالیٰ علیہ وسلم نے فرمایا: جس نے اذان کو مسجد میں پایا پھر وہاں سے نکل گیا حالانکہ اسے نکلنے کی کوئی حاجت بھی نہ تھی اور واپسی کا ارادہ نہ رکھتا ہو تو وہ منافق ہے

در مختار میں ہے 

مکروہ تحریمی ہے ممانعت کے سبب نکلنا اس شخص کا جس نے نماز نہ پڑھی ہو اس مسجد سے جس میں اذان ہوگئی ہو، شارح نے کہا ماتن اکثر پرچلا ہے (یعنی اکثر یہی ہوتاہے کہ اذان کا وقت ہونے پر اذان ہوجاتی ہے) اور مراد اذان ہونے سے وقت نماز کا آجانا ہے خواہ مسجد میں اذان ہوئی ہو یا نہ 

بحر الرائق باب ادراک الفریضہ، جلد دوم میں ہے: الظاھر من الخروج من غیرصلاۃ عدم الصلوٰۃ مع الجماعة، الخ نماز کے بغیر نکلنے سے ظاہرًا مراد یہ ہے کہ جماعت کے ساتھ نماز ادانہ کی ہو، الخ

 المدینہ اکیڈمی

 نیز” بہار شریعت جدید حصہ سوم المکتبۃ المدینہ۔ 656 میں ہے: اذان کے بعد مسجد سے نکلنے کی اجازت نہیں، حدیث میں فرمایا: کہ ’’اذان کے بعد مسجد سے نہیں نکلتا، مگر منافق۔‘‘ لیکن وہ شخص کہ کسی کام کے لیے گیا اور واپسی کا ارادہ رکھتا ہے یعنی قبل قیام جماعت۔ یوہیں جو شخص دوسری مسجد کی جماعت کا منتظم ہو تو اسے چلا جانا چاہیے 

بحوالہ ’’ مراسیل أبي داود ‘‘ مع ’’ سنن أبي داود ‘‘ ، باب ماجاء في الاذان، ص ۶ ’’ غنیۃ المتملي ‘‘ ، أحکام المسجد، ص ۶۱۳) 

 اسی میں آگے ص 702 پر ہے: اذان سے مراد وقت نماز ہوجانا ہے، خواہ ابھی اذان ہوئی ہو یا نہیں

حاصل یہ کہ جب وقت نماز ہو جائے تو بنا ضرورت بے ادائیگی نماز مسجد سے نہیں جانا چاہئے اور ضرورت ہو تو اذان کیا اگر یہاں “تکبیر” اقامت بھی ہورہی ہو تو جانے میں حرج نہیں۔

جیساکہ بہار شریعت مرجع سابق، ص 702 ہی میں بحوالہ. درمختار، ردالمحتار
ہے: جو شخص کسی دوسری مسجد کی جماعت کا منتظم ہو، مثلاً امام یا مؤذن ہو کہ اُس کے ہونے سے لوگ ہوتے ہیں ورنہ متفرق ہو جاتے ہیں ایسے شخص کو اجازت ہے کہ یہاں سے اپنی مسجد کو چلا جائے اگرچہ یہاں اقامت بھی شروع ہوگئی ہو مگر جس مسجد کا منتظم ہے اگر وہاں جماعت ہو چکی تو اب یہاں سے جانے کی اجازت نہیں بحوالہ. درمختار، ردالمحتار 

واللہ ورسولہ اعلم بالصواب