غیر مسلم سلام کرے تو مسلم کیا جواب دے /نیز رام رام کہنا کیسا ہے؟

سوال

السلام علیکم ورحمۃ اللہ و برکاتہ

 علماء کرام کی بارگاہ میں عرض ہے کہ کسی غیر مسلم نے مسلمان کو سلام کیا تو اس کا جواب دینا کیسا ہے اور جواب میں کیا کہنا چاہیے

٢ مسلمان کو غیر مسلم سے رام رام کرنا کیسا ہے؟

 مدلل جواب عنایت فرمائیں بہت مہربانی ہوگی

 المستفتی :محمد شیردین قادری
متھرا یوپی انڈیا 

 وعليكم السلام ورحمۃ اللہ تعالیٰ وبرکاتہ

 صورت مستفسرہ میں مسلمان جواب دے سکتا ہے اور جواب میں صرف ”وعلیکم” کہے.لیکن اگر اس سے کام نہ چل سکے تو جیسے چاہے جواب دے دے یا سلام کے جواب میں سلام ہی کہہ دے.

 حدیث شریف میں ہے

 
عن انس رضی الله عنه، قال: قال رسول الله ﷺ ” إذا سلم علیكم أھل الکلتاب فقولوا: وعلیکم ”متفق علیه”

 فتاویٰ عالمگیری میں ہے

 

ولا بأس برد السلام علی أھل الذمة ولکن لا یزاد علی قوله”وعلیکم”

 بہار شریعت میں ہے:کفار کو سلام نہ کرے اور وہ سلام کریں تو جواب دے سکتا ہے مگر جواب میں صرف عَلَیْکُمْ کہے

 ابو حنیفہ ہند اعلیٰ حضرت امام احمد رضا خان علیہ رحمۃ الرحمٰن سے سوال ہوا کہ جواب سلام کفار و ہنادک کن الفاظ میں دیا جائے تو آپ نے جوابا ارشاد فرمایا

 “کافر اگر بے لفظ سلام سلام کرے تو ایسے ہی الفاظ رائجہ جواب میں بس ہیں۔اور بلفظ سلام ابتداء کرے تو علماء فرماتے ہیں جواب میں وعلیک کہے مگر یہ لفظ یہاں مخصوص باہل اسلام ٹھہرا ہوا ہے۔اور وہ کافر بھی اسے جواب سلام نہ سمجھے گا بلکہ اپنے ساتھ استہزاء خیال کرے گا تو جس لفظ سے مناسب جانے جواب دے لے اگر چہ سلام کے جواب میں سلام ہی کہہ دے

بیشک امام محمد رحمۃ اللہ تعالٰی علیہ نے تصریح فرمائی کہ جواب میں سلام کی نیت کی جائے۔اور ﷲ تعالٰی بڑا عالم ہے

 فتاویٰ رضویہ مترجم ج:٢٢ ص:٣١٦/مرکز اہلسنت برکات رضا

. 

فتاویٰ فقیہ ملت میں ہے: رام رام، جے رام جی کی، نمستے، نمسکار کرنا حرام و گناہ ہے اس لئے کہ یہ غیر مسلموں کا شعار ہے. اگر کوئی نمستے، نمسکار، جے رام جی کی کہے تو سب کو معلوم ہو جاتا ہے کہ یہ ہندو ہے.

 نوٹ اگر حالت مجبوری ہو تو الضرورات تبیح المحظورات کے تحت نمستے، نمسکار کہہ سکتا ہے. 

اسی طرح فتاویٰ فقیہ ملت ج:٢ ص:٣٢٥/شبیر برادرز لاہور.میں ہے

 
واللہ ورسولہ اعلم بالصواب